Vadodara :
વડોદરા પીસીબીની ટીમે માંજલપુરના સહજાનંદનગરમાં દરોડો પાડી મકાનની પાણીની ટાંકી અને ટોયલેટમાં દારૂનો જથ્થો સંતાડી વેચાણ કરતા બુટલેગરને ઝડપી પાડ્યો હતો. દરોડા દરમિયાન પોલીસે દારૂની ચાર પેટી સાથે રૂ.31 હજાર ઉપરાંતનો મુદ્દામાલ કબજે કરી દારૂ આપનાર શખ્સને વોન્ટેડ જાહેર કરી તેની ધરપકડના ચક્રો ગતિમાન કર્યા છે.
પીસીબી પોલીસ ટીમના કર્મચારીઓ પેટ્રોલિંગમાં હતા ત્યારે બનેલી ઘટના :
ગણેશ પર્વે દારૂની હેરાફેરી ડામવા માટે બુટલેગરોને ઝડપી પાડવા પીસીબી પોલીસ ટીમના કર્મચારીઓ પેટ્રોલિંગમાં હતા. તે સમયે ચોક્કસ માહિતી મળી હતી કે, માંજલપુર વિસ્તારની સ્વામી સહજાનંદ નગરમાં રહેતો ગીતેષ ધોન્ડીરામ મહાડીક દારૂનો ધંધો કરે છે. હાલમાં ઘરની પાણીની ટાંકી તથા ટોઇલેટમાં દારૂનો જથ્થો સંતાડી રાખી વેચાણ ચાલુ છે. જેના આધારે પોલીસે દરોડો પાડતા પાણીની ટાંકી માંથી તથા ટોયલેટ માંથી દારૂની બે બે પેટી મળી આવી હતી.
આ પણ વાંચો…ઘરે જ તૈયાર કરો ચીઝી બર્સ્ટ ગાર્લિક બ્રેડ
પોલીસની પ્રાથમિક પૂછતાછમાં આરોપીએ આ દારૂનો જથ્થો ગિરધરભાઈ ( રહે – છાણી જકાતનાકા) પાસેથી મેળવ્યો હોવાની કબુલાત કરી હતી. માંજલપુર પોલીસે ભારતીય બનાવટની વિહસ્કીની રૂ.21,120ની કિંમતની 48 બોટલ તથા મોબાઇલ ફોન સહિત રૂ. 31,120નો મુદ્દામાલ કબજે કરી પ્રોહિબિશન એક્ટ હેઠળ વધુ તપાસ હાથ ધરી છે.
